لقاء جعجعلى جعجع جعجعلى

فى لقاء بالامس أقل ما يصوف بأنه فاشل مع مجلس ادارة مركز الشباب – ده لو كان فيه مجلس ادارة -
كان الشعار الاساسى للقاء " جعجعلى جعجع جعجعلى " . تركنا لهم الحديث كيفما شائوا دون ان يقاطعهم احد –على أمل الا يقاطعنا احد عندما نتكلم - ، ولكن فوجئنا بالقاء التهم جزافا على الشباب بصفة عامة وعلى الحاضرين من الشباب بصفة خاصة ، وكانت التهم كالتالى :
* قال مجلس الادارة "انتو فاشلين ومعملتوش اى حاجة فى البلد "
الرد " احنا بقلنا اقل من 7 شهور شغاليين بدون اى دعم او اى موارد او مؤسسة او جهة رسمية ، وحاولنا نعمل اللى قدرنا عليه لدرجة اننا نزلنا لمينا الزبالة من الشارع بإدينا .....، ولكن انتو بئلكوا اكثر من 18 سنة ماسكين النادى والمحليات وجمعية التنمية ومعملتوش اى حاجة على مدى 18 سنة ، ولا صندوق زبالة واحد جبتهوه ، بل على العكس تماما ، لما واحد عمل مشروع لجمع الزبالة من الشوارع والمشروع نجح ، فرضتوا عليه – كجمعية تنمية ومحليات – فرضوتو عليه إتواه مما جعل صاحب المشروع يتركه ، واللى عاوز يتأكد ممكن يسأل .
وبعد ده كله لسه لكو عين تتكلموا
- والرد ده طبعا معرفناش نقوله لانه مكنش فيه فرصة لأى حد يقول 5 كلمات على بعض – تحت شعار معاكوا 5 ثوان تقولوا فيها اللى انتو عوزينو من غير ما اطعكوا .
* قال مجلس الادارة " انا فتحتلكوا النادى ( مركز الكمبيوتر يعنى ) وقلتلكوا تعالوا اشتغلو يا ناكرين الجميل - يا خلبيس يا وحشين - . ولما لقتكو وخدينو لحسابكوا قلت لأ اخد منهم المفاتيح .
ملحوظة - يا خلبيس يا وحشين – من عندى ، اصل حد يجى يعملنا مجلس عرفى ويقول انا مقولتش كدا .
الرد : خلاص هو النادى بئا مركز كمبيوتر ، وكل ما حد يقول حاجة ، تقولو مركز الكمبيوتر، مركز الكمبيوتر. وبعدين مركز الكمبيوتر معاكوا بقالوا اكثر من 8 سنين مقفول عليه بالضبة والمفتاح ، ما شغلتوهوش انتم ليه ولا جبتو حد يشغلوا ، ولو احنا فاشلين زى ما بتقولوا ، بردو الجيل اللى قبلنا واللى قبله واللى قبله واللى واللى واللى ... كلهم فاشلين ، ده على كده البلد كلها فاشلة ، وانتو اللى فاهمين . وبعدين حكاية " ولما لقتكو وخدينو لحسابكوا قلت " لأ " اخد منهم المفاتيح " .
كمبيوترات ايه اللى هنخدها لحسابنا ، كلنا عندنا اجهزة الواحد منهم بمقام مركز الكمبيوتر كله . ولكن قولنا نحاول نشجع الناس انها تدخل النادى ونعيد الثقة ، لكن الناس معندهاش اى ثقة فى النادى ولا المسئولين عنه ، وبيقوللنا دول شوية حـ ..... . اما بالنسبة للمفاتيح فاحنا اللى سلمنها ، ما فيش حد طلبها مننا ولا حاجة زى ما قالوا
وبعدين لو عندكو حسن نية كنتو قبلتو العضويات اللى اتقدمت من الشباب – اكثر من 50 عضوية لشباب البلد – وكل ما نقولهم ، يقول مش وقتو، مش وقتو _ وده اكبر دليل ان ما فيش حسن نية ولا بتنجان ولا طعمية مقلية .
* سب وقذف صريح لجمعية الاحسان والقائمين عليها واتهامهم بالسرقة .
واحد هيسئلنى " هو ايه دخل جمعية الاحسان فى الحديث عن النادى " هقولوا ده كان من باب جر الناس لمواضيع جانبية واستفزاز بعض الحاضرين من الجمعية علشا ن حد يغلط ، وبعدين يجى يقولو احنا رضينا نقابلهم ونقعد معاهم وفى الاخر يشتمونا " لكن الناس كانت على قدر كبير من الاحترام وفهم هذه المكائد .
نرجع تانى لمرجُعنا والسب والقذف الصريح لجمعية الاحسان والقائمين عليها واتهامهم بالسرقة . وهنا بئا هتسمع العجب العجاب ،.
1*- جالكوا 12 الف جنيه من بنك الطعام واتخنقتوا عليها .... مع العلم ان بنك الطعام - من اسمه يا ناس- بيدّى طعام - يعنى آآآآكل أكل - .
2*- " اخذتوا 12 الف جنيه من فلوس اليتامى والفقرا وعملتوا بيها فطار جماعى فى رمضان فى مسجد الشهدا ".
نفسى اعرف شكله ايه الفطار ابو 12 الف جنيه ده !!!!! ، ده لو هيجيبوه من كنتاكى مش هيكلف كده . دا الواحد بيعمل الفرح فى البلد وبيعزم اهل البلد كلهم وبيجيب اكل يكفى الناس كلها ، وما بيعديش 2، 3 الاف جنيه .
فاكرين الاشاعة اللى طلعت على بتوع التحرير زمان ايام الثورة انهم بيخدوا بالدولار وبياكلو من كنتاكى . نفس عقلية فلول الحزب الواطى .
* قال مجلس الادارة " انا فتحتلكو جمعية التنمية وقلتلكوا تعالو خدوها وهديكو مجلس الادارة ، وبعد كدا ما لقتش حد منكو ، وفضلت اجرى وراكو وانتو اللى مطنشين " .
لا تعليق ......... ولا اقولكو هرد وخلاص .
احنا فضلنا ماشين معاه على مدار شهور وقعدنا معاه فى النادى اكثر من مرة ، وكل مرة يقولنا اصل هعقد اجتماع طارئ ابصر مش عارف ايه ، .... طيب استنوا على اسبوعين علشان ايه .... ، وفى الاخر طيب استنوا 70 يوم علشان هطلب انعقاد جمعية عمومية لحل المجلس و ......... فوتوا علينا بكرة . لاننا المفروض كنا نستلمها 30/6/ اللى فات ....
ده كان مجرد رد على كل التهم العجاف اللى اتوجهتلنا فى الجلسة . لكن احنا لسا ما كشفناش ورقنا .
والله يشهد إن كنت زدت او انقصت كلاما . وكله مسجل .
واترك للعقلاء الحكم .